هذا شرح بسيط عشان تكون الصورة واضحة.

جدامكم ٣ مراحل. كل مرحلة فيها ١٢ سؤال كل واحد فيكم يجاوبه عن الثاني وفي حال كانت اجابتك صح بشهادة اللي تلعب معاه تاخذ النقطة/النقاط المحددة للسؤال وإذا كان غلط ما تاخذ ولا نقطة وتكملون بهالطريقة لما تخلصون كل الأسئلة.

مجموع كل الأسئلة ٩٩ نقطة وبالسؤال الأول، خل كل واحد منكم يتوقع شكثر يعرف الثاني من ٩٩ وبنهاية اللعبة، إذا كان توقعكم نفس النتيجة النهائية، راح تاخذون نقطة السؤال.

حلو؟

حلو، بلشوا سألوا بعض الاسئلة بالترتيب، كل سؤال يجاوبه واحد فيكم عن الثاني صح ياخذ نقاطه وكل ما زادت اجاباتك الصح كل ما زادت نقاطك كل ما طلعت تعرف الشخص اللي جدامك عدل 🥇

بس لا تنسون تسجلون النقاط بورقة النتايج أو على ورقة عندكم أو بملاحظات التليفون عشان كل واحد فيكم يحفظ حقه بدون غش!

استخدموا الكرت المرجع عشان تعرفون عدد النقاط المحددة لكل سؤال.

ها، بانت فيلجا؟

منو فيكم طلع يعرف الثاني اكثر ولا طلعتوا انتوا الاثنين ما تعرفون بعض عدل؟ ولا اثنينكم حافظين بعض؟

بكل الحالات، بمجرد ما خصصتوا جزء من وقتكم حق بعض وقررتوا تلعبون جواب مع بعض فأنتوا اثبتوا انكم تعزون بعض وخذيتوا خطوة تقربكم حق بعض اكثر.

وايد ناس عزيزين علينا بس مرات الأيام تاخذنا وننسى شنو فيهم حساسية منه أو إذا للحين يفضلون قعدة البيت والنومة والقعدة مبجر ولا صاروا يحبون الطلعات والروحات والييات والسهر. ومطعمهم المفضل اهوا نفسه اللي خبرنا فيه؟ ولا حاشهم تسمم منه وصار عندهم مطعم مفضل ثاني غيره؟

سهل ننسى القراب منا بس انتوا خذيتوا خطوة تقربكم من بعض أكثر واكتشفتوا جواب، عشان جذي كفو عليكم.